Soel aande,
Lekker kos,
Warm mense,
Ryk geskiedenis...
Dit, opgesom, was Istanbul vir ons!
Ons het baie laat eers besluit om Istanbul deel van ons somervakansie te maak en het met geen verwagtinge in die ry op Istanbul lughawe gestaan om ons Turkse visums te koop ... dalk juis daarom dat die volgende 4 dae vir ons so ongelooflik aangenaam was!
Dit was reeds donker toe ons by ons hotel in Sultanahmet aankom en by die ontvangs hoor dat Ramadan vandag begin het! Die man moes my en Herrie se bekommerde uitdrukkings gesien het toe gedagtes van 4 lang honger dae deur ons koppe flits, want hy't vinnig verduidelik dat restaurante wel gedurende die dag oop is maar dat die Turke slegs na sononder mag eet! Ons is na die Hippodrome verwys waar een handwerk of kosstalletjie op die volgende te vinde was met honderde Turke en kinders net waar jy kyk! Omdat daar heeldag nie nat of droog oor hulle lippe was nie, het die volk baljaar tot in die vroëe oggendure... iets wat blykbaar heel normaal is vir die volle maand van Ramadan.
'n Heerlike döner met regte lamsvleis was die gepaste maaltyd op ons eerste aand in Turkye en baklava van die ware Jakob (Karakoy sedert 1949) was die perfekte proppie! Ons sien ook hoe baklava gemaak word... iets wat BAIE geduld verg!
Hippodrome, eerste aand van Ramadan
Ingelegde eiers?!
Daardie nag is ons 04h00 wakker gesing deur 'n man wat oor 'n luidspreker bid... Hertzog was vas oortuig dat daai megafoon êrens in ons kamer is!
Ons geniet olywe, feta, waatlemoen en brood op die hotel se dakterras vir ontbyt waarna ons van die Hippodrome af al langs Divan Yolu stap tot by Corlulu Alipasa Medresesi - 'n plekkie wat deur Davut (Herrie se Turkse medestudent) aanbeveel is. 'n Juweel van 'n plek en ons het appeltee en turkse koffie probeer en lui aan 'n waterpyp geteug terwyl baba katjies ons vermaak... Ons was omring deur mans wat almal dieselfde doen: appeltee drink en sheesha rook. Ek was vir baie lank die enigste vrou in die plek... iets waaraan ek oor die volgende 3 dae gewoond geraak het.
Oppad uit moet ek gou piepie,
in 'n gat,
en laat val my bril!
NEEEEEEEEE!!!!!!
Corlulu Alipasa Medresesi
Nadat my bril herhaaldelik gewas is, vat ons die pad na die Grand Bazar! Enige vrou se droom en meeste mans (veral as joune so min van inkopies hou soos myne) se nagmerrie! 1200 winkels met die mooiste handgeverfde porselein bakke, leer skoene, handsakke, juwele, serpe en pragtige glaslampe lok 250 000 tot 400 000 besoekers per dag! Daar was soveel mooi goed vir die huis wat ek wou hê maar ons is toe net met 'n paar Turkse lampe daar weg vir 'n huis wat nog nie eers op papier bestaan nie :-)
Grand Bazar
Ons het 'n interessante gesprek met Nizam aangeknoop, 'n 33-jarige, getroude, moderne Turkse man wat aan ons die lampe verkoop het. Ná hy 'n paar persoonlike vrae en kommentaar na my kant toe gegooi het, o.a. dat ons selfsugtig is omdat ons nog nie kinders wil hê nie, vra ek hom hoekom mens so min Turkse vrouens op straat sien. Sy eerste antwoord was dat hulle rus as gevolg van Ramadan, maar toe hy sien dat ons nie byt nie het hy gesê dis omdat sy vrou te mooi is vir ander mans om na te kyk! Ongelooflik dat daar in vandag se tyd nog sulke sienings oor die vrou se rol in die gemeenskap kan wees.
By die Kebab Hospital het ons aan 'n verskeidenheid Turkse geregte gesmul en deur die loop van die middag gou na Hagia Sofia, Blue Mosque, Beyazit square en die Universiteit gaan kyk.
Bo vlnr: Hagia Sophia en Blue Mosque; Onder: Universiteit
Ons het by die Hippodrome na 'n fontein gestaar en hom werklik bewonder nadat ons gelees het dat hierdie "German Fountain" in Duitsland gebou is en toe in 1900 hier aanmekaar gesit is. Die fontein bestaan uit 8 marmer kolomme en die dak binne is uitgevoer met goue mosaiek teëltjies!
German Fountain, Hippodrome
Drankies, musakka en steak by Cozy Pub was op die spyskaart vir aandete waarna ons in 'n doodse slaap verval het totdat ons weer 04h00 wakker gesing is :-)
Cozy Pub
Sultanahmet snags
Woensdag was ons vroeër uit die vere, 08h00 :-), want ons wou ná ontbyt gou na die Basilica Cistern gaan kyk voordat ons 'n afspraak 11h00 het.
Die Yerebatan of Basilica Cistern is 'n geweldige plek met 'n ongelooflike atmosfeer! Dit staan ook as die Sunken Palace bekend, maar was nooit bogronds nie en is in 532 n.C. gebou as put en stoorplek van die naby geleë paleis se water. Mens gaan by 'n klein deurtjie op die sypaadjie by die Yerebatan in, minwetend dat die plek amper 1000 vierkante meter beslaan, deur 336 marmer kolomme gestut en 'n 4 meter dik muur omring word! Dit laat mens nogals wonder hoeveel van die ou wêreld lê steeds vandag nog onder ons moderne strate en winkels opgesluit...
Een van die dele van 'n James Bond fliek, From Russia with Love, is hier verfilm.
Yerebatan of Sunken Palace
Volgende op ons agenda was 'n kulturele ervaring: 'n Turkse bad of hamam soos dit hier bekend staan. (Net gou iets anders wat ons in Istabul opgeval het, ons het nooit van publieke busse of treine gebruik gemaak terwyl ons daar was nie... deels omdat ons stapafstand van meeste besienswaardighede af gebly het, maar ook omdat elke hamam, bootrit, restaurant ens. 'n bussie het wat kliente by die hotelle gaan oplaai!)
By Suleymaniye hamam aangekom het ons bypassende swemklere van katoen en vreeslike ongemaklike hout sandale gekry om aan te trek en is na 'n groot marmer vertrek gelei wat tussen 40 en 60ºC gehou word. Hier het ons op 'n warm marmer blad gelê en sweet vir 50 minute, in dieselfde vertrek waar die Suleyman Sultan dit 450 jaar gelede gedoen het! Die hamam is tussen 1550 en 1557 gebou en is deur 'n bekende argitek in Turkye, Sinan, ontwerp. Na die sweet word mens vir so halfuur deur 'n mannetjie geskrop en dan van kop tot tone met seep masseer. Ek dink ons was lanklaas so skoon! Na afloop van die skropsessie word jy afgedroog en in lappe toe gedraai en dis hier waar my kamera toegelaat is. Moenie skrik nie, Herrie was baie bleek en lighoofdig van die warm kry en ek was letterlik pers!
Suleymaniye Hamam
Ons spring op 'n "hop-on hop-off" bus en na skaars 10 minute se ry besef ons dat Istanbul meer is as 'n oulike toeriste plekkie met mooi moskees... dis 'n groot, moderne stad wat
20 000 000 mense huis noem! Dit is ook die enigste hoofstad in die wêreld wat oor 2 kontinente strek en nadat ons die Bosphorus brug gekruis het was ons in Asië.
20 000 000 mense huis noem! Dit is ook die enigste hoofstad in die wêreld wat oor 2 kontinente strek en nadat ons die Bosphorus brug gekruis het was ons in Asië.
Istanbul: Moderne metropool
Terug in Europa klim ons af naby "Galata Tower" en ek sê: "ek dink dit gaan reën", Herrie: "hoekom, hop jou knieg?" Haha! Paar minute later het daar wel 'n druppel of 3 geval. Die "Galata Tower" is in 528 n.C. opgerig en is blykbaar volgens gerugte die oudste toring in die wêreld wat nog toeganklik is. Ons het ook oor die Galata Brug gestap na die "New Mosque" en talle vissermanne op die brug teegekom en paar kinders wat sorgeloos in die rivier speel beny.
Vissermanne op die Bosphorus Brug
Galata Tower en Bosphorus Brug
Ons was vinnig in by die "New Mosque" - wat lankal nie meer so nuut is nie - en ek is behoorlik aangetrek deur die omie wat by die deur waghou sodat geen skraps geklede dames verby hom glip nie. Interessant was dat die vrouens 'n afgesonderde area het waar hulle mag bid!
New Mosque
Hierdie was so opwindende dag maar ek glo amper dat die hoogtepunt die "Spice Bazar" was! Ek is mal oor eksotiese geure en 'n antieke mark spesiaal vir speserye reg daar waar Asië en Europa ontmoet, het my baie opgewonde gehad! Al die stalletjies verkoop speserye, neute of die mooiste lekkergoed... te kies en te keur en almal nooi jou in om te kom proe!
Te kies en te GEUR
Yum!
Ons stap terug hotel toe en besef dat al die winkels wat dieselfde goed verkoop almal langs mekaar is en so is daar strate wat net metaal knope, of badproppe of springtoue verkoop. Hoeveel verskillende ligskakelaars kan daar nou wees? Lyk my 'n straat vol! Nog iets wat ek en Herrie opgelet en eienaardig gevind het, is dat almal die grond voor hulle winkels of stalletjie natspuit so mens ruik heeldag daai lekker reënreuk...
Birds of a feather flock together (behalwe as jy onder op die "corporate ladder" sit...)
Ons put nog bietjie waarde uit ons 24-uur "hop-on hop-off" buskaartjie en gaan kyk die sonsondergang van die ander kant van die Bosphorus Brug af!
Een aand in Asië ;-)
Toe Hagia Sophia die volgende oggend oopmaak was ons daar! Dit was die grootste katedraal in die wêreld vir amper 'n 1000 jaar en die huidige gebou is in 532 n.C. opgerig! Interessant van die Hagia Sophia is dat daar deur die jare heen soveel verskillende gelowe en groepe mense was wat in hierdie gebou aanbid het... Dit was aanvanklik die Grieks-Ortodokse Patriarg van Konstantinopel, daarrna 'n Rooms-Katolieke Katedraal, toe 'n Moskee en vandag 'n museum. Die Hagia Sophia word gekenmerk deur 'n massiewe koepel wat as die toonbeeld van Bisantynse argitektuur erken is en daar word gesê dat hierdie gebou die geskiedenis van argitektuur verander het! Vir my was die fyn mosaiek teëltjies besonders.
Hagia Sophia
Ons het die res van die oggend op 'n boot spandeer en 'n toer van die Bosphorus Rivier gedoen. Dit was nogals verbasend hoeveel meer mense aan die Europese oewer van die rivier woon in vergelyking met die Asië kant!
Die roete
Bosphorus River Cruise
Europa vs Asië oewers
Oppad terug het die boot by Kizkulesi, of "Maiden's Tower", gestop vir paar minute sodat ons kan opgaan en die uitsig waardeer. Die eerste struktuur wat op hierdie skiereiland waar die "Maiden's Tower" vandag is bestaan het, was 'n grafkelder wat 'n bevelvoerder vir sy vrou laat oprig het in 410 v.C.! Die "Maiden's Tower" lê op die kruising tussen 2 kontinente en het vir 2500 waargeneem wat in die omliggende areas plaasvind en hierdie het tot baie legendariese stories gelei. Een van hierdie legendes is dat die Bisantynse keiser 'n baba dogtertjie gehad het en 'n siener het voorspel dat sy voor haar 18de verjaarsdag deur 'n slang doodgepik sal word. Die keiser het toe die "Maiden's Tower" omskep in 'n huisie en het sy dogter alleen daar op die eiland laat woon waar geen slange by haar kon uitkom nie, maar op haar 18de verjaarsdag was daar fees gevier en 'n slang het in 'n mandjie vol druiwe op die eiland beland en die dogter doodgepik! Die les wat die volk hieruit moes leer is dat jou lot onvermydelik is.
Bo-op die toring sê Herrie vir my: "Anellie ek dink daai is windbrekers", toe draai die oom voor ons om en sê: "O is dit?!"
Maiden's Tower
In Istanbul sien jy katte ORALS! In winkelvensters, onder tafels in restaurante, in die moskees, bo-op karre se dakke.... En die vreemde ding is dat hulle niemand pla nie! Die toeriste geniet dit om met hulle te speel en stilletjies onder die tafel te voer en inwoners van Istanbul los orals vir hulle katkos en bakkies water.
Katjies van Istanbul
Gedurende die middag het ons die Topkapi Sarayi (Paleis) besoek. Dis hier waar die Ottoman Sultan gewoon het vir 400 jaar, saam met al sy vrouens en slawe. Die gronde het mooi oop tuine, vele binnehowe en die indrukwekkende Harem... Die Harem is waar meer as 1000 vrouens en byvrouens gewoon het en hulle is gereeld besoek deur die sultan en sy seuns. Die byvrouens was buitelandse slawe en almal het gehoop om die sultan se gunsteling te raak en vir hom 'n seun in die wêreld te bring... dat dit nou jou lewensdroom kan wees... ander tye! Die Harem is 'n kakofonie van kleure en patrone en die bont teëls is nogals oorweldigend in sommige vertrekke.
Haat jy jou werk?
Stel jou voor jy is die arme siel wat deur die Sultan aangewys is om die goud
op hierdie buite geboue van die Topkapi paleis se plafonne te verf!
Harem, kakofonie van kleure en patrone
Ons betaal 34 Euro vir 'n koppie koffie, 'n coke en 'n botterbroodjie voordat ons die paleis verlaat en al langs die mooiste straatjies tot by die "Blue Mosque" stap. By die Sultanahmet Mosque, of "Blue Mosque", is ons weer oorweldig deur baie bont teëls! {Hoor hoe snaaks, ek is bang julle raak moeg vir my as ek heeltyd die woord "oorweldig" gebruik en google toe die woord om 'n sinoniem te kry, toe vra google vir my: "Did you mean "athletic"?" Huh?! Hahaha}
Die mure van die "Blue Mosque" is binne versier met meer as 20 000 stukkies blou, groen en wit "iznik china"!
Die mure van die "Blue Mosque" is binne versier met meer as 20 000 stukkies blou, groen en wit "iznik china"!
Blue Mosque of Sultanahmet Mosque
Ons laaste maaltyd in Istanbul geniet ons op die dakterras van 'n oulike restaurantjie met 'n seeuitsig en gesels oor alles wat ons in die afgelope paar dae ervaar en beleef het! Ons is voorwaar baie geseënd... Sou ons gespaar bly sal ons graag eendag weer wil terug keer na hierdie ongelooflike stad!
Laaste Istanbul aand
Die volgende oggend is ons weer vroeg wakker gesing waarna ons gou gepak en die pad gevat het lughawe toe waar 'n vliegtuig gewag het om ons Thessaloniki toe te vat! Ja, hierdie was mos 'n lekker laaang vakansie en 2 volle weke in Griekeland het nog voorgelê... Maar ons avonture daar spaar ek vir 'n "rainy day" - want daar is BAIE van hulle in Rotterdam!
