Deel 2: Berge, Bratislava, Bruilof, Ballet & Beerpong!

So ek het voor die naweek nog vertel van die Twin City Liner wat ons van Bratislava na Wien geneem het...

WIEN

Stad van kuns en kultuur!  Gustav Klimt en musiekmeesters soos Mozart, Beethoven, Haydn, Strauss en Schubert het êrens in hul lewens na Wien as huis verwys.  In 2010 het Wien die 8ste posisie in die  "Top 25 Livable Cities" beklee en ons het ons vergaap aan al die mooi winkels (Rolex en Patek Philippe in elke derde venster) en pragtige ou geboue!

In 2000 was Herrie as uitruilstudent in Wien en ons het sy ou vriend Dominik by die Naschmarkt ontmoet vir ete waarna ons na die Museumsquartier gestap het vir 'n bier.  Hier het Dominik ook baie trots aangekondig dat Oostenryk stadig maar seker besig is om hul buurman Duitsland verby te vat wat die bier verbruik per capita betref.  Hulle is beide steeds vêr agter Czech Republic wat loshande voorloop op die gebied!   Oppad huistoe stap ons deur Hofburg en Heldenpark en waardeer die mooi verligte geboue.

Wien snags

Donderdag het sommer baie goed afgeskop want ek't op Happy Hippos afgekom (sjokolade wat van my sussie 'n verslaafde gemaak het toe sy in Londen gebly het) en ek't sommer 'n hele pak vir Carien in 'n koevert gesit en in die pos gegooi!

Die res van die oggend het ons by die Belvedere spandeer - 'n baie mooi barok paleis met interessante tuine wat die somerhuis van Prins Eugene van Savoy was.

Belvedere, Wien

Ons het rustig by Karlplatz na twee omies geluister wat trekklavier speel terwyl ons die Karlkirche se grootheid inneem. Verder het ons na die Rathaus, Parlament, verskeie kerke (o.a die Stepahnsdom) en mooi tuine gaan kyk en het op baie vreemde stoele in die Museumsquartier afgekom.

 Stoele in Museumsquartier

 Kerke in Wien

Ons het lekker vêr gestap vandag en elke keer as ek net vir 'n sekonde stop om iets te doen dan vra Herrie soos 'n gramafoonplaat wat vashaak in sy radiostem vir my: "Hast du ein Stein in deine Schuh?"  Nadat ons heeldag rondgestap het, stop ons by Hotel Sacher om die befaamde Sacher törte te eet - "when in Wien..."

 Heerlik dekadent!

Ons laaste aand in Wien spandeer ons in die Turkse deel van die stad saam met Dominik en sy meisie Clarissa en oppad huistoe neem Herrie my na een van die bekendste koffiehuise in Wien wat hy onthou van sy skooldae - Cafe Hawelka. Gaan kyk bietjie na die onderstaande link as jul belangstel, die geskiedenis van die plekkie is baie oulik!  Dis in 1939 geopen en vir jare deur 'n ou man en sy vrou bestuur en die Tannie is in 2005 oorlede maar Leopold Hawelka het hierdie jaar sy 100ste verjaarsdag gevier en groet steeds besoekers by die koffiehuis meeste aande!  Sy seun, 70 jaar oud, is tans die bestuurder van Cafe Hawelka en die se 2 seuns help ook daar uit.

http://www.hawelka.at/

Aandete en Cafe Hawelka

Vrydagoggend het ons gou 'n draai deur die winkels gehardloop en ek koop skoene by Timberland wat meer as die helfde minder is as in die winkel in Rotterdam... soos ek altyd vir Herrie sê: mens máák basies geld by 'n "sale" :-D

Die hoogtepunt van ons oggend was toe ek en Herrie toevallig albei sien hoe 'n Beagle (hond) aan 'n leiband in die straat loop en homself boeglam skrik vir 'n staal beeldjie van 'n hond buite 'n winkel!  Toe hy agterkom dis net 'n beeld het hy baie verleë verder gestap en gehoop niemand het hom gesien nie.

 Lanklaas so lekker gelag!

Ons laaste uitstappie in Wien voordat ons in die pad geval het na Linz, was Schönbrunn Paleis toe  - pragtig!

 Schönbrunn

In Linz het ons een aand by Niki - 'n goeie vriend van Hertzog wat verlede jaar vir 4 dae SA toe gekom het om ons troue by te woon - se male se huis geslaap.  Die Tannie het 'n ekstra kar in Vienna gehad wat sy vir ons aangebied het want haar voorstel was dat ons deur die wynplase moet ry na Linz want dis landskappe wat ons nie met die trein sou sien nie.  Ná Schonbrunn het ons die pad uit Wien in die rigting van Linz gevat en na Krems gery, vanwaar ons al langs die Donau rivier in die Wachau distrik gery het wat bekend is vir witwyn in Oostenryk.   Dis 'n idiliese area en ons kon die cabriolet se dak afslaan en soos grênd mense rondry met die wind in ons hare!  Ons het by Weisekirchen gestop en deur die baie oulike dorpie gestap en wyn gekoop by 'n tannie wat ook al in die Kaap gaan wyn drink het.  Dit was nie nodig om te wonder of ons by die regte huis parkeer het toe ons in Linz aankom nie want agter op Niki se kar pronk 'n Suid Afrikaanse vlaggie!  Ek is seker hy't dit by my skoonpa geleer toe hy in SA kom kuier het!

Oppad van Wien na Linz...

LINZ

'n Vriendin van my wat destyds saam met my in Brussels gebly het, Meli, het toevallig die naweek wat ons in Linz was getrou!  Ek't haar so week voor ons beplan het om soontoe te gaan laat weet ek wil haar graag sien en ons is dadelik troue toe genooi.  Omdat ons slegs 1 dag in Linz gehad het, het ons besluit om slegs die formele seremonie in die Rathaus by te woon en ek't haar vinnig Vrydagmiddag ontmoet vir 'n drankie terwyl Herrie en Niki by die kasteel iets drink.

Eerste kuier na 5 jaar

Ná 'n lekker ontbyt in die tuin is ons na Meli & Ralf se troue wat baie oulik was vir 'n siviele diens en na afloop van die formaliteite het ons saam met die familie (wie ek almal destyds ontmoet het toe hulle in Brussels kom kuier het) 'n glasie sekt by die rivier gaan drink en handgemaakte papierblomme in die water laat afdryf...

 Meli & Ralf Hochzeit

Die res van die dag het ons bietjie om die swembad ontspan saam met die Schröter familie en toe vir oulaas gaan kyk wat Linz bied en op 'n middeleeuse fees afgekom!  Ons het lekker gelag vir die manne wat messe gooi, pyl & boog skiet en in belaglike pakkies in die strate rondstap. 

 Linz

Niki moes met ons stasie toe jaag en ons is net betyds om op die trein Praag toe te spring!  Die trein was vrek warm en die 5 ure rit is darem onderbreek met 'n 15 minute stop êrens in die Czech platteland waar ek gou afhop vir roomys.  'n Groot ou vrou klim op die trein by hierdie stasie met haar markaankope en Herrie het net betyds 'n tamatie onder haar boude weggevat toe sy minwetend amper op hom gaan sit - dit was so hittite of sy hand én die tamatie was in die slag, was baie snaaks!

 Trein na Praag

PRAAG

Ons arriveer so teen 22h00 by ons gastehuis waar ons gavrou, Kristina, ons inwag met haar borrelende vriedelikheid en 'n koue Gambrinus - dis nie verniet die land met die hoogste bierverbruik nie!  Tripadvisor het weereens nie teleurgestel met hul verwysing nie en ons het heerlik hier gebly.

Sondagoggend word ons wakker en onthou dat Herrie se klasse weer hierdie week begin :-(

Maar ons besef darem vinnig weer dat ons nog eers 3 lekker dae saam in Praag het :-)

Ons vat die pad na die ou kasteel area toe, Vysehrad, waar daar 'n mooi kerk met 'n pragtige begraafplaas is waar mense soos Antonin Dvorak (Czech komponis) begrawe is.

 Vysehrad area met mooi begraafplaas

Oppad na die staat opera waar ons wou kaartjies bespreek vir Swan Lake, besoek ons die botaniese tuine (waar ons maklik inkom maar baie sukkel om weer uit te kom!) en het pragtige uitsigte van Praag soos ons stap.  Herrie het ook bietjie vir ons getoi-toi langs die pad toe hy die opdrag sien :-)

Ons geniet middagete op Hotel U Prince se dakterras wat ek tydens my navorsing oor Praag uitgesnuffel het en waardeer die mooi uitsig oor die dorpsplein en oudorp.

Middagete op dakterras

Ons wou aanvanklik die dorpsplein na ete verken maar die miljoene toeriste wat rondmaal en die bekende "atomic clock" probeer sien, het ons gou terug gejaag gastehuis toe waar yskoue sangria en 'n middagslapie na die ideale Sondagmiddag plan geklink het!  Later die aand is ons terug na die oudorp en stap die Joodse roete in "Jewish Prague" en gaan kyk na vele sinagoges.  Daarna is ons na 'n gesellige biersaal wat die Lonely Planet aanbeveel het, U Vejvodu, waar ons 'n lekker biertjie drink voor ons die oudorp in die nag verken.  

 Praag as dit donker raak...

Die volgende oggend na Kristina se standaard "tasty toasties" en haar "best latte in Prague", stap ons na die kabelkar wat ons opvat na Petrin toe. Bo aangekom loop ons deur prentjiemooi roostuine voor ons by die Petrin tower - 'n 60m hoë  bonzai eiffel tower  - opklim en daarbo 100'e mense en 'n monnik skrum om 'n foto te neem by een van die venstertjies.   Terug op vaste grond het ons die toilet besoek waar Hertzog by die ingang moes besluit of hy vir 10Kr wil "Pisoar" of vir 15Kr wil "kakabinne"! Vreemde plek hierdie...

 Petrin, Praag

Van Petrin af het ons deur 'n valleitjie met wingerde en pruime na die kasteel gestap, bietjie daar rondgekyk, lekker gelag vir die wagte wat soos die manne by Buckingham Palace wil wees,  en na 'n oulike band geluister wie se CD ons toe ook gekoop het.  Ons het so stadig deur die kasteel af dorp toe gestap (dis die grootste antieke kasteel in die wêreld met klomp kerke op die perseel) en die aand by Mlejnice gaan eet waar Herrie homself vasgeloop het in 800gr ribs!

 Somer in Praag en lekker eet by Mlejnice

Op ons laaste aand in Praag het ons opgestap na die operahuis vir Swan Lake! Dit was 'n baie goeie vertoning ten spyte van die feit dat daar nie 'n orkes in die put was nie en die operahuis is pragtig! Ons het die aand afgesluit met 'n drankie op Hotel U Prince se dakterras en het die mooi verligte stad waardeer.  Dit was 'n wonderlike aand in Praha!

 Swan Lake

Dinsdag was ons vroeg op om te pak en het 'n staptoer van die oustad gaan doen (dankie iphone) wat goed soos die "municipal house", "powder gate" en die "charles bridge" insluit wat ons nie vroeër gesien het nie.  Herrie was stééds nie moeg vir varkvleis wat ons vir 'n volle 10 dae geëet het nie en werk vir oulaas 'n worsbroodjie in wat ons op 'n bankie in die middel van die "druggie" straat geniet -  ons is gewaarsku dat ons nie hier moet loop nie want eienaardige karakters mag ons dalk nader maar ons het glad niks vreemd gevind nie!  Ons het vir oulaas die kleure en geure van 'n pragtige stad ingeneem en paar baie aggressiewe duiwe gevoer voordat ons aanstaltes gemaak het lughawe toe vanwaar ons terug na Rotterdam gevlieg het.

Laaste daggie in Praag

Ietsie wat ek waardeer het in Praag was die moeite wat hulle met die sypaadjies gedoen het...  nie jou standaard teer of sementblokke nie, maar interessante patrone van verskillende klip!

Mooiste sypaadjies

Daar is regtig ongelooflike mooi geboue in Praag en dit het my orals opgeval hoe mooi meeste geboue versorg is en in helder klere op straathoeke pronk!  Ek weet jul is waarskynlik nou moeg vir foto's van hierdie plek so dis nou die heel laaste :-)

Pragtige Praag geboue

Dit was voorwaar 'n lekker week en 'n half gewees!

Ek weet dat van julle dalk dink ons hou nét vakansie hierdie jaar, (en ek is seker Herrie se Ouma sou sê ons het wielietjies onder ons boude) maar Herrie het Vrydag klaar gemaak met hierdie kort termyn en is al sy vakke van die 2de termyn goed deur!  Sy lang somervakansie breek met ander woorde vandag aan en ek is so dankbaar dat ons maande gelede toe ons begin navors het waar ons hierdie 3 weke lange breuk wil deurbring, besluit het op 'n plek met son want die somer het steeds nog nie in Rotterdam aangebreek nie.

Ons gaan vanmiddag tot Vrydag Istanbul toe en dan Griekeland... son & see...
KAN NIE WAG NIE!!
Ons bly in Griekeland by een van ons vriende, Christos, in Thessaloniki vir 'n week, dan Athene vir 1 aand en dan Santorini....  Ek het nie gedink een mens kan meer opgewonde raak as wat ek voor die naweek reeds was nie, maar Christos het die naweek vir ons foto's gewys van plekke waarheen hy beplan om ons te vat en nou kan ek regtig nie meer wag nie!

Hoop dit gaan goed met almal, ons hoor graag van julle!
Van my hoor julle weer die laaste week in Augustus.

Doei!
x