The Beautiful South sing 'n liedjie, Rotterdam. In hierdie liedjie sing hul onder andere: "This could be Rotterdam or anywhere..." - wat my laat wonder of hulle al hier was, want Rotterdam is baie uniek en soos geen ander stad in Nederland nie!
Rotterdam het beslis nie die klassieke skoonheid en "oudheid" van Amsterdam nie, en dalk ook nie die sjarme van klein Hollandse dorpies soos Delft nie, maar dis 'n interessante, moderne Europese stad, vol unieke geboue en nuwe wolkekrabbers (mooi woord né)! Die Kaaskoppies hou oor die algemeen nie baie van Rotterdam nie, want hul sê dat die stad nie Nederland verteenwoordig nie - "fair enough" - maar ek het nog nie een gebore Rotterdammer teegekom wat enige ander plek wil bly nie! Dis in elk geval nie uit keuse dat Rotterdam nie vandag nog met ou, skeuwe Hollandse huisies kan spog nie, want hierdie modernisering is as gevolg van die Tweede Wêreldoorlog en die Blitz...
Die Rotterdam Blitz verwys na die middag van 14 Mei 1940, toe meer as 1200 bomme in 'n kwessie van 45 minute op Rotterdam neer gereën het en brande die hart van die stad verwoes het. Rotterdam was 'n strategiese hawestad wat Hitler graag wou verower en die generaals wat hy na Rotterdam gestuur het, het gedreig dat die stad vernietig sou word met die hoop om die Hollanders tot oorgawe te dwing. Na vele onderhandelings is 'n ooreenkoms tog bereik, maar as gevolg van 'n gebrek aan komminikasie aan die Duitse kant en lae sigbaarheid, het die boodskap te laat by die Duitse bomwerpers uitgekom wat tot die onnodige bombardering van die hart van Rotterdam gelei het.
Rotterdam in die 1930's
Rotterdam in 1940
Om seker te maak dat niemand van hierdie tragiese verwoesting van die stad vergeet nie, is 'n beeld naamlik "De Verwoeste Stad" in 1953 by Leuvehaven opgerig wat 'n man voorstel met 'n gat in sy maag en arms wat vraend na die hemel uitgestrek is. Ook het ons die "brandgrens" wat ons daagliks herinner watter grondgebied verwoes is deur die bomme van 14 Mei en die daaropvolgende brande wat dae lank in Rotterdam gesmeul het. Sedert 2010 is die sogenaamde brandgrens in Rotterdam volledig uitgestip met rooi liggies in die plaveisel.
Liggies van brandgrens en beeld: De Verwoeste Stad
Die heropbou program van Rotterdam is binne twee weke na die einde van die oorlog opgetrek. Die stad het 'n radikale breuk met die verlede gemaak en 'n nuwe roete ingevaar vir die herdefiniëring van die beeld van die stad: lig, lug en ruimte was die sleutelwoorde. Plaaslike en buitelandse argitekte het na Rotterdam gestroom want hulle het al die ruimte gehad wat hulle nodig gehad het, letterlik en figuurlik, en vandag is Rotterdam 'n lofsang aan die moderne argitektuur en 'n droombestemming vir enige argitek! Ek vergaap my weekliks aan interessante geboue wat ek hier raakloop.
In 1954, is die Lijnbaan voltooi, die eerste voetgangers koopstraat in Europa. Geboue soos die Erasmusbrug, "Kubus woningen" en Maastoring (die hoogste gebou in Nederland) is net 'n paar van die vernaamste nuwe toevoegings in Rotterdam en ek is oortuig daarvan dat wanneer ek en Herrie in 10 jaar van nou af die geleentheid het om weer in Rotterdam te draai, ons baie van die geboue nie sal herken nie. Die stad se kontemporêre beeld is verseker te danke aan die strewe na innovasie!
Paar interessante geboue in Rotterdam. Hoe skeuwer, bonter, ronder, vreemder... hoe beter!
Op die boonste verdieping van die gebou heel bo regs, is waar ons Saterdagaand gekuier het vir RSM se gala! Ek't nou op 'n website afgekom wat op verskeie interessante geboue in Rotterdam se argitektuur fokus, sou jy belangstel:
Ander bekende geboue wat sinoniem is aan Rotterdam sluit die Wittehuis (wat spesiaal nie gebom is nie sodat dit as kantore vir die Duitsers kan dien), die Euromast ('n 185 meter hoë toring), die Laurenskerk (enigste oorblyfsel van middeleeuse Rotterdam wat na die oorlog restoureer is en vandag gebruik word vir kerkdienste, konserte en "rave" partytjies) en Hotel New York in. Dan is daar ook ander bekende gesigte soos die Willemsbrug (rooie) en die Erasmusbrug wat se bynaam "De Zwaan" is, asook die Kubus huisies, die biblioteek met sy geel lugpype, Oudehaven, Binnenrotte se mark, die hawe en Het Park wat vir ewig in my kop geprent sal bly!
Bekende prentjies van Rotterdam wat my altyd sal bybly
Oe, ander interesante goed in Rotterdam is die über moderne treinstasies. Hulle is al die hele jaar besig om Rotterdam Centraal te opgradeer en deesdae pronk hy met 'n reuse, driehoekige, staal punt in die lug - sal maar foto's van hom neem wanneer hy nader aan klaar is as ons kom vir Herrie se gradeplegtigheid in Maart. Ons stasie, Blaak, spog sedert 1993 met 'n nuwe voorkoms, dié van 'n vlieënde piering wat hang aan 'n koperboog van 62 meter! Treine en moltreine stop beide onder die grond en ook daar is die stasie baie modern.
Blaak Station, Rotterdam
Ons lewe in Rotterdam het die laaste ruk 'n paar interessante kuiers ingesluit, onder andere 'n Vrydagaand fliek by die "pleinbioscoop" wat ek, Meredith, Rachel & Kalina bygewoon het - ons het True Grit gesien. Vir 'n week lank was daar 'n ope-lug fliek in Museumpark met die oulikste stalletjies wat kos en drankies verkoop het uit karavane en ou kratte uit die hawe! Bo-op elke krat en karavaan was daar 'n paar verskillende lampies met flou ligte wat die atmosfeer lekker gesellig gemaak het. 4 Euro het vir jou 'n toegangskaartjie en 'n opvoustoel besorg en in ware Hollandse styl het almal hulle stoele in netjiese, reguit rye (met 'n middelpadjie) gaan uitpak - mal daaroor! Ons het net lekker snoesig in ons kombersies ingewikkel en die wyn geskink toe die aankondiger vra dat almal hulle stoele 2 meter vorentoe skuif... die "neeeeee" wat die gehoor soos een man geskree het, het die inspanning van die skuif die moeite werd gemaak :-)
Pleinbioscoop, Museumpark
Rachel het verjaar en nadat ons by "De Stoep" gekuier het en al die seuntjies soos Herrie wat daar was huistoe is, het die dames aanbeweeg na "Gay Palace". Dit was my eerste keer in so uitgaanplek maar dit was baie pret! Al wat bietjie vreemd was is dat mens wel nogals aandag kry van ander mense wat kyke of aanbiedinge om drankies te betaal betref, maar dit kom van ander meisies af... Iemand het 'n geselsie met Arden aangeknoop en toe sy mooi vir haar sê dat sy in 'n verhouding met Terry is, toe sê die meisie: "Oh, my condolences" - haha, classic! Ons het vroegoggend op die fietse gespring en terug gery huistoe... ek agterop by Joyce want ek en Herrie het vroeër die aand na die restaurant gestap so Vonk was by die huis!
Gay Palace vir Rachel se verjaarsdag
Dan was daar ook 'n Griekse inval so 3 weke gelede toe 2 van ons Griekse vriende se meisies besluit het om op dieselfde naweek te kom kuier, en een van hulle het 2 vriendinne saamgebring. Ek het vir Athina & Effie beide al op vorige geleenthede ontmoet en dit was so lekker om weer almal saam te kuier hier in Rotterdam!
Big Fat Greek Party met 2 Suid Afrikaners en 'n Rus
Griekse maatjies in Rotterdam
Ons het ook ons eerste Halloween partytjie bygewoon, Herrie as 'n "brain donor" en ek as "Miss Conception". Die partytjie was by Ioannis se woonstel en soos dit maar met studente partytjies werk, raak dit hoe later hoe kwater en toe ons weer sien begin die Grieke in sirkels dans en Ioannis kap van sy borde uit die kombuis stukkend! Haha!
Halloween!
Omdat Sinterklaas eers die 5de Desember kom en meeste van die MBA studente dan al reeds terug huistoe of met vakansie is, het Simone (een van ons Hollandse vriendinne wat saam met Herrie swot) besluit om almal na haar huis te nooi verlede week sodat ons 'n voorsmakie kry van vieringe in hierdie seisoen by 'n Hollandse gesin in Den Haag. Die kaggel, glühwein, "speculaas" en "olibollen" het gesorg vir die perfekte stemming en die horings op Simone se kop en haar Pa se kersvaderhoedjie was te dierbaar! Elke gas moes 2 geskenke bring: een regte een en een grap en als is op 'n groot hoop gepak. Ons het in 'n kring gesit en vir ure lank 'n speletjie gespeel waar almal een of ander tyd iets moet oopmaak, wat baie pret was en niemand is met leë hande huistoe nie (selfs al is dit nou 'n boks vol grond). Dit was heerlik om nog 'n smakie van die Hollandse kultuur te kry, bedankt Simone!
<---- Sint kom vroeg na Den Haag
Dis so lekker om van al die verskillende nasionaliteite waarmee ons hierdie jaar te doen kry se kulture te leer. Buiten die Grieke se danse, die Amerikaners se halloween en die Hollanders se kerstradisies, was ons onlangs by 'n Koreaanse paartjie aan huis in Delft. June swot saam met Hertzog en sy en haar man woon al 3 jaar in Nederland. Sy het vreeslik lekker (en vreeslik baie) gekook uit 'n Koreaanse resepteboek en die gedroogte rissies wat sy gebruik het kom uit haar Ma se tuin! Dit wil gedoen word.
Koreaans by June & Hans in Delft
So van kook gepraat, siende dat ek 'n super-bevoorregde-huishen was hierdie jaar oor my visum my nie toegelaat het om te werk nie, het ek al die tyd in die wêreld gehad om etes voor te berei en het 'n liefde vir kook ontwikkel! Ons het ook gereeld maats oorgehad vir ete by ons en dan het ek gesorg dat almal genoeg eet... ek dink dis nou maar net ingebore in ons kultuur om mense te wil voer :-) Dis so lekker as mens tyd het om by die mark te snuffel vir vars produkte en dan te sorg dat als mooi voorgesit word...
As ek so na die foto's kyk maak dit sin dat ons bietjie "ronder" huistoe kom :-)
Ongelukkig het die woonstel waar ons nou die laaste 6 maande van die jaar gebly het nie 'n oond nie - iets wat ons agtergekom het baie min woonstelle in Holland wel het. So ons het 'n reeling met Rachel & Joyce oorkant die straat om van tyd tot tyd hul oond te gebruik en daarom het ek en Herrie een Sondag al die bestanddele vir 'n Suid Afrikaanse middagete gekoop en by hulle woonstel gaan kook om dankie te sê. Dit was nogals snaaks om heen en weer met potte oor die straat te loop!
Good food. Good friends. Good times.
'n Ander stokperdjie waarmee ek in Rotterdam begin het is naaldwerk - ek weet, wie sou kon raai dat dit soveel plesier kan verskaf?! As ek eers met iets begin, is dit al wat ek wil doen, die wêreld kan maar om my vergaan... Meredith het my aan die begin van die jaar begin leer en ons het 'n paar projekies saam op haar naaimasjien aangepak tot Herrie my verras het met 'n masjien vir my verjaarsdag!
Beste geskenk ooit!
Ek't oorweeg om in te skryf vir 'n paar klasse by die "Naaikafee" - ja, jy lees reg - hier af in die straat van ons, maar hulle tye het nie lekker ooreengestem met my hondeloopsessies nie, so ek het maar myself geleer aan die hand van youtube "tutorials". Ek't al 'n rompie of 3 gemaak, maar meeste projekte tot nou was heel eenvoudig, soos my eerste groot ding was 'n piekniek kombers... hy't heel lekker gewerk in die paar dae wat ons somer gehad het! Ook het ek al 'n kussingsloop, sak, paar stelle plekmatjies en monsters vir familie & vriende se kinders gemaak en ek werk huidiglik aan my eerste "quilt" vir 'n spesiale vriendin se babatjie...
The only place where housework comes before needlework is in the dictionary. ~Mary Kurtz
O, soooo waar!
Voordat ek die dinge wat ons hierdie jaar vergader het begin pak, wil ek hierdie nuusbrokkie afsluit deur afgelope Donderdagaand se "Thanksgiving" met julle te deel - nog 'n eerste vir ons boertjies. 3 van ons naby vriende (Meredith, Elliot & Rachel) is Amerikaners en hulle wou graag hierdie tradisie in Rotterdam vier en ek & Herrie, Jason ('n ander Amerikaner in die MBA program), Joyce (Rachel se metgesel) en Ilonka & Klaartje (Meredith se bure) is genooi om saam te eet! Almal het iets gebring en dit was meeste mense se eerste poging tot kalkoen of "pumpkin pie" maar die kos was fantasties en die atmosfeer baie spesiaal. Ek en Meredith het die middag al vir Rachel gaan help om die kalkoen te stop - dit was baie snaaks!
Mer rek die beentjies oop terwyl Rachel stop...
Gedurende die ete het ons gepraat oor die verskillende tradisies in almal se families en almal het om die tafel gesê waarvoor hulle dankbaar is. Ek't terwyl die ander gepraat het aan soveel goed gedink om te sê en was oortuig daarvan dat hulle gaan sukkel om my stil te maak, maar toe ek aan die beurt kom was ek skielik te bewoë om te praat! Familie, vriende, ons gesondheid, goeie kos, goeie wyn, die mense wat ons lief het en 'n wonderlike jaar in Rotterdam wat alle verwagtinge oortref het en waarin kosbare bande gebou is, was van die dinge wat genoem is...
Thanksgiving!
Ons jaar in Rotterdam was so geseënd, in alle opsigte en nou dat ons aan die einde daarvan staan en al die laastes aanbreek is dit swaar om afskeid te neem.
Rotterdam, stad sonder hart, jy't verseker 'n stukkie van myne... vir altyd!
x
